Երբ ստեղծագործությունն ու հոգատարությունը միավորվում են, ծնվում են իսկապես գեղեցիկ նախաձեռնություններ․ հենց այդպիսին էր FPWC-ի Վայրի կենդանիների փրկարարական կենտրոնում անցկացված մեր վերջին Դդմի օրը։ Այս անգամ օրը պարզապես դդմի մասին չէր․ այն առանձնահատուկ էր նաև Մխիթար Սեբաստացի կրթահամալիրի աշակերտների շնորհիվ, ովքեր նոր ու հետաքրքիր մոտեցում բերեցին արջերի հարստացման գործընթացին։

Այս ստեղծագործ երեխաները նախագծել և պատրաստել էին յուրահատուկ «խաղալիքներ» մեր փրկված արջերի համար՝ հարստացման պարագաներ, որոնց մեջ թաքցված էին դդմային անակնկալներ։ Նման ակտիվությունները չափազանց կարևոր են արջերի բարեկեցության համար, քանի որ նրանց հնարավորություն են տալիս դրսևորելու բնական վարքագիծ՝ սնունդ որոնել, խնդիրներ լուծել, ուսումնասիրել նոր հոտեր ու նոր միջավայրեր։ Վայրի բնության մեջ արջերը սիրում են մարտահրավերներ, և մեր փրկված արջերը նույնպես բացառություն չեն։

Աշակերտները ոչ միայն ստեղծել էին այս յուրօրինակ հարստացման պարագաները, այլև հնարավորություն էին ստացել այցելել կենտրոն և սեփական աչքերով տեսնել, թե ինչպես են արջերը վայելում իրենց դդմով լի «նվերները»։ Այցի ընթացքում նրանք նաև ծանոթացել են փրկված կենդանիների բնական վարքագիծը պահպանելու կարևորությանը և լսել հետաքրքիր փաստեր արջերի կյանքի մասին՝ թե՛ վայրի բնության մեջ, թե՛ մեր փրկարարական կենտրոնում։

FPWC-ում մենք հավատում ենք կրթության ուժին, որը կարող է ոգեշնչել վայրի բնության պաշտպանների նոր սերնդին։ Տեսնել, թե ինչպես են երիտասարդները ներգրավվում նման նախաձեռնություններում՝ միավորելով ստեղծագործությունը, բնության նկատմամբ հոգատարությունն ու սովորելու ցանկությունը, իսկապես ոգեշնչող է և հիշեցնում է, թե որքան մեծ արդյունքների կարող ենք հասնել միասին՝ հանուն Հայաստանի վայրի բնության։

Շնորհակալություն ենք հայտնում Մխիթար Սեբաստացի կրթահամալիրի բոլոր աշակերտներին և ուսուցիչներին՝ իրենց ոգևորության և աջակցության համար։ Միասին մենք դրական փոփոխություն ենք ստեղծում Հայաստանի փրկված արջերի կյանքի համար՝ մեկ դդումով սկսած։

Ցանկանու՞մ եք այցելել կամ աջակցել մեր Փրկարարական կենտրոնին։ Հետևե՛ք մեզ, որպեսզի տեղեկանաք ներգրավվելու և փոփոխություն ստեղծելու նոր հնարավորությունների մասին։