Վայրի ուտելի անտառների ստեղծում. ինչպե՞ս է ծառատունկը մեղմում մարդ-կենդանի կոնֆլիկտը

2025 թվականի աշնանը Վայրի բնության և մշակութային արժեքների պահպանման հիմնադրամը (FPWC) հաջողությամբ ավարտեց սեզոնային ծառատունկի արշավը, որի շրջանակում Հայաստանի բնական լանդշաֆտներում տնկվեց ավելի քան 200,000 տնկի։

Անտառվերականգնման աշխատանքներում FPWC-ն առաջնահերթությունը տալիս է ոչ միայն քանակին, այլև՝ որակին, գիտական պլանավորմանը և երկարաժամկետ ազդեցությանը։ Հիմնադրամն օգտագործում է թիրախային տնկման հայեցակարգի (Target Plant Concept (TPC)) մեթոդաբանությունը, որը նպատակ ունի ապահովել ծառերի կպչողականության և գոյատևման առավելագույն ցուցանիշներ։

Մեր մոտեցումը ներառում է.

- Օգտագործվում են բացառապես տեղական (էնդեմիկ) բուսատեսակների սերմեր՝ յուրաքանչյուր լանդշաֆտի առանձնահատկություններին համապատասխան։

- Տնկիներն աճեցվում են FPWC-ի տնկարաններում այնպիսի պայմաններում, որոնք առավելագույնս մոտ են դրանց մշտական տնկման վայրի միջավայրին։

- Քանի որ տնկիները նախապես հարմարեցված են տեղի կլիմայական և հողային պայմաններին, դրանց արմատավորման մակարդակը բացառիկ բարձր է։

Անտառային էկոհամակարգերի վերականգնումից բացի, այս աշխատանքը նպաստում է նաև վայրի ուտելի անտառների ստեղծմանը։ Այս լանդշաֆտները դառնում են սննդի կարևոր աղբյուր վայրի կենդանիների՝ արջերի, վայրի խոզերի և քարայծերի համար։ Սա օգնում է նվազեցնել կենդանիների տեղաշարժը դեպի բնակավայրեր՝ նպաստելով մարդու և վայրի բնության երկարաժամկետ համակեցությանը։

Գիտահեն անտառվերականգնման միջոցով FPWC-ն շարունակում է վերականգնել էկոհամակարգերը, հզորացնել կենսաբազմազանությունը և ստեղծել դիմակայուն բնական լանդշաֆտներ ողջ Հայաստանում։