Հունիսի 25-ին Ուրցաձորում գտնվող FPWC Էկոկենտրոնը հյուրընկալեց գործընկերներին և համակիրներին՝ «Հայաստանում անտառների վերականգնում և կլիմայական փոփոխություններ» (FORACCA) ծրագրի ղեկավար հանձնաժողովի անդրանիկ նիստի շրջանակներում:

Հանդիպումը մեկտեղել էր տարբեր կողմերի՝ կառավարության ներկայացուցիչներ, դոնորներ, քաղաքացիական հասարակության անդամներ և գիտնականներ, որոնք միավորված են մեկ նպատակի շուրջ՝ վերականգնել Հայաստանի անտառները և կերտել առավել դիմակայուն ու կանաչ ապագա: Սա հիանալի հնարավորություն էր ամփոփելու արդեն իսկ ձեռքբերված արդյունքները, փոխանակվելու փորձով և նախանշելու հետագա հստակ քայլերը:

Հանձնաժողովը համագործակցության հարթակ է, որտեղ որոշումներն ընդունվում են բաց քննարկումների և համատեղ ջանքերի միջոցով: Ծրագրի հիմնական դոնորը՝ Հայաստանում Շվեյցարիայի զարգացման և համագործակցության գործակալությունն է (SDC), առանցքային դերակատարում ունի՝ սերտորեն համագործակցելով ՀՀ շրջակա միջավայրի նախարարության և Շվեյցարիայի անտառների, ձյան և լանդշաֆտային հետազոտությունների դաշնային ինստիտուտի (WSL) հետ՝ ծրագրի ուղղությունները համակարգելու նպատակով:

FORACCA ծրագիրն իրականացվում է չորս կազմակերպությունների կողմից, որոնք ձևավորում են Հայաստանի անտառային դաշինքը.

- «Շեն» բարեգործական ՀԿ

- «Իմ անտառ Հայաստան» (My Forest Armenia) ՀԿ

- «ԷՅ-ԹԻ-ՓԻ» բարեգործական հիմնադրամ

- Վայրի բնության և մշակութային արժեքների պահպանման հիմնադրամ (FPWC)

Մասնավորապես, FPWC-ն կստանձնի Եղեգիս և Արենի համայնքներում 250 հեկտար անտառի վերականգնման աշխատանքների ղեկավարումը, ինչպես նաև նոր տնկարան կկառուցի Ուշի գյուղում: Այս տնկարանը առանցքային դեր կխաղա տեղական տեսակների տնկիների աճեցման և ողջ երկրում անտառվերականգնման երկարաժամկետ ծրագրերի աջակցության գործում:

Օրվա կարևորագույն թեմաներից մեկը իրականացնող կազմակերպությունների առջև ծառացած գործնական մարտահրավերներն էին, հատկապես՝ իրավական և հարկային բնույթի խոչընդոտները, որոնք բարդացնում են հողօգտագործումն ու երկարաժամկետ պլանավորումը: Այդ իսկ պատճառով կձևավորվի մասնագիտացված աշխատանքային խումբ, որը կհամագործակցի Շրջակա միջավայրի նախարարության հետ՝ նպատակ ունենալով մշակել իրավական բարեփոխումների նախագծեր, որոնք կդյուրացնեն անտառտնկման և անտառպատման գործընթացները:

«Հայաստանում անտառների վերականգնում և կլիմայական փոփոխություններ»  (FORACCA) ծրագիրը ֆինանսավորվում է Շվեյցարիայի զարգացման և համագործակցության գործակալության (SDC) կողմից և համաֆինանսավորվում է Հայաստանի անտառային դաշինքի անդամ չորս իրականացնող կազմակերպությունների՝ «Շեն» ՀԿ-ի, «Իմ անտառ Հայաստան» ՀԿ-ի, «ԷՅ-ԹԻ-ՓԻ» բարեգործական հիմնադրամի և Վայրի բնության և մշակութային արժեքների պահպանման հիմնադրամի (FPWC) կողմից: Ծրագիրն իրականացվում է Շվեյցարիայի անտառների, ձյան և լանդշաֆտային հետազոտությունների դաշնային ինստիտուտի (WSL) հետ համագործակցությամբ: