Հունիսի 1-ին՝ Երեխաների պաշտպանության միջազգային օրվա կապակցությամբ, Վայրի բնության և մշակութային արժեքների պահպանման հիմնադրամը (FPWC) իր Կենդանիների վերականգնողական կենտրոնի (WRC) դռները բացեց Վահան Տերյանի անվան թիվ 60 և Կարմիրգյուղի թիվ 1 դպրոցների սաների առջև։ Այցը միավորեց ավելի քան 30 աշակերտների՝ բացահայտումների, ստեղծագործական աշխատանքի և Հայաստանի ինքնատիպ վայրի բնության հետ անմիջական հաղորդակցման մեկ օրվա շուրջ։

Ժամանման առաջին իսկ պահից երեխաները հայտնվեցին մի միջավայրում, որտեղ բնության հանդեպ հոգատարությունն ու կարեկցանքը կենսակերպ են։ Այցի առանցքում կենտրոնի խնամյալների, այդ թվում՝ ներկայումս վերականգնողական փուլում գտնվող գորշ արջերի հետ ծանոթությունն էր։ Սա պարզապես ճանաչողական այց չէր, այլ գործնական փորձառություն՝ միտված ներշնչելու ներկայացնելու վայրի կենդանիների պահպանման կարևորությունը։

FPWC-ի մասնագետների ուղղորդմամբ աշակերտները պատրաստեցին հատուկ «զարգացնող խաղեր» արջերի համար՝ օգտագործելով թարմ մրգեր, բանջարեղեն և բնական նյութեր։ Խնձորներից, ճակնդեղից ու գազարից պատրաստված շղթաները կազմելիս երեխաները սովորեցին, թե ինչպես են նմանատիպ վարժանքները նպաստում կենդանիների ֆիզիկական և մտավոր ակտիվությանը։ Սա համակեցության հզոր դաս էր՝ հիշեցնելով նրանց, որ նույնիսկ հոգատարության փոքրիկ քայլերը կարող են էական նշանակություն ունենալ։

Կենտրոնից դուրս՝ Կովկասյան կենսաբազմազանության ապաստարանի (CWR) լանդշաֆտների գրկում, աշակերտները շրջեցին կանաչապատ տարածքով, հարցեր ուղղեցին կենդանիների վարքագծի մասին և ծանոթացան փրկված կենդանիների պատմություններին։ Շատերի համար սա բնության պահպանությանն առնչվող առաջին անմիջական հանդիպումն էր, և նրանց ոգևորությունը վարակիչ էր։

Ողջ օրվա ընթացքում ինտերակտիվ աշխատանքները, ջերմ զրույցներն ու համատեղ քննարկումները միավորեցին տարբեր դպրոցների երեխաներին՝ ամրապնդելով բնապահպանական գիտակցությունը, նոր ընկերություններն ու թիմային աշխատանքը։

FPWC-ի համար կայուն ապագայի կերտումը սկսվում է մատաղ սերնդի մեջ հետաքրքրասիրության և կարեկցանքի սերմանումից։ Նմանատիպ միջոցառումները մեր առաքելության անբաժանելի մասն են՝ կրթել բնության պաշտպանների նոր սերունդ, ովքեր կշարունակեն համակեցության մեր որդեգրած ժառանգությունը։