2024 թվականի հոկտեմբերի 16-17-ը FPWC-ի հիմնադիր և տնօրեն Ռուբեն Խաչատրյանը, ինչպես նաև ծրագրերի տնօրեն Սոնա Կալանթարյանը մասնակցել են BirdLife-ի Եվրոպական գործընկերության հանդիպմանը, որը կայացել է Ալմաթիում, Ղրղզստանում։ Տեղական BirdLife գործընկեր ACBK-ի կողմից հյուրընկալված այս հանդիպումը կարևոր առիթ էր BirdLife-ի գործընկերների համար՝ ամփոփելու 2022 թվականից ի վեր ունեցած ձեռքբերումները, քննարկելու 2024 թվականի աշխատանքային պլանը, ֆինանսական հարցերն ու ընդհանուր իրավիճակի վերլուծությունը, ինչպես նաև նախանշելու 2025-2026 թվականների առաջնահերթությունները։

Հանդիպման հիմնական թեմաներից մեկը քաղաքացիական տարածքի սահմանափակման, ապատեղեկատվության տարածման և բնության դեմ ուղղված հարձակումների աճող վտանգն էր, հատկապես՝ աշխարհում և տարածաշրջանում ծայրահեղ աջ քաղաքական խմբերի ազդեցության ուժեղացման պայմաններում։ Քննարկումները կենտրոնացած էին այնպիսի գործնական քայլերի մշակման վրա, որոնք կօգնեն արձագանքել այս քաղաքական և բնապահպանական սպառնալիքներին՝ ընդգծելով միասնական ճակատով հանդես գալու անհրաժեշտությունը բնության պահպանության ջանքերը պաշտպանելու համար։

Մեկ այլ կարևոր թեմա էր աֆրիկա-եվրասիական միգրացիոն ուղիների համար նոր ռազմավարական շրջանակների ներկայացումը, այդ թվում՝ EAFI, CAFI և EAEF նախաձեռնությունները, որոնք արժեքավոր պատկերացում տվեցին BirdLife-ի առաջնահերթությունների և այս կենսական նշանակություն ունեցող չվող ուղիների պահպանության ուղղությամբ տարվող աշխատանքների մասին։ Բացի այդ, քննարկվել է նաև RENATE (Recovering Nature in the East) նախաձեռնության և Nature Restoration Working Group-ի առաջընթացը՝ շեշտադրելով տարածաշրջանում էկոհամակարգերի վերականգնման և կենսաբազմազանության ամրապնդման ուղղությամբ կատարվող աշխատանքները։

Հանդիպման ընթացքում ընդգծվել է նաև վերականգնվող էներգետիկայի, հատկապես քամու և արևային էներգիայի զարգացման կարևորությունը, ինչպես նաև BirdLife-ի կառուցողական դերը այս անցումային գործընթացում։ Քննարկվել է գործընկեր կազմակերպությունների ռազմավարությունների մշակման առաջընթացը՝ վերականգնվող էներգետիկ նախաձեռնություններին աջակցելու համար, ընդգծելով, որ բնապահպանական կազմակերպությունները պետք է ակտիվ դերակատարում ունենան կայուն էներգետիկ ապագայի ձևավորման հարցում։

Հատկանշական է, որ սա FPWC-ի համար առաջին Եվրոպական գործընկերության հանդիպումն էր՝ որպես BirdLife-ի նոր գործընկեր։ Սա կարևոր հանգրվան է FPWC-ի համագործակցության պատմության մեջ։ Ռուբեն Խաչատրյանի և Սոնա Կալանթարյանի մասնակցությունը ևս մեկ անգամ արտացոլում է FPWC-ի հանձնառությունը՝ նպաստելու տարածաշրջանային և գլոբալ բնապահպանական ջանքերին, զարգացնելու գործընկերություններ և ապահովելու, որ Հայաստանի ձայնը լսելի լինի բնության պահպանության ապագայի վերաբերյալ կարևոր քննարկումներում։