Հուլիսի 22-ին Վայրի բնության և մշակութային արժեքների պահպանման հիմնադրամը (FPWC) հնարավորություն ունեցավ մասնակցելու բարձր մակարդակի հանդիպման, որը կայացել է Բնության պահպանության միջազգային միության (IUCN) և ՀՀ նորանշանակ շրջակա միջավայրի նախարար պարոն Համբարձում Մաթևոսյանի միջև։ Հանդիպումը կազմակերպվել էր IUCN-ի պաշտոնական առաքելության շրջանակում, որը տեղի էր ունենում Երևանում հուլիսի 22-24-ը և նպատակ ուներ ամրապնդել տարածաշրջանային համագործակցությունը կլիմայական գործողությունների և կենսաբազմազանության պահպանության ուղղությամբ։

IUCN պատվիրակությունը, որը գլխավորում էին Եվրոպական տարածաշրջանային գրասենյակի տնօրեն Բորիս Էրգը և Արևելյան Եվրոպայի և Կենտրոնական Ասիայի տարածաշրջանային տնօրեն Օլիվեր Ավրամոսկին, ընդգծեցին Հայաստանի աճող դերը գլոբալ բնապահպանական օրակարգում։ Որպես IUCN անդամ՝ FPWC-ն ևս իր ներդրումն ունեցավ քննարկումներում՝ հիմնադրամի տնօրեն Ռուբեն Խաչատրյանի մասնակցությամբ։

Քննարկման հիմնական թեմաներից էին Հայաստանի պատրաստությունները՝ 2026 թվականի հոկտեմբերին Երևանում կայանալիք ՄԱԿ-ի Կենսաբազմազանության կոնֆերանսը (CBD COP17) հյուրընկալելու ուղղությամբ, ինչպես նաև մասնակցությունը Աբու Դաբիում կայանալիք IUCN Համաշխարհային բնապահպանական կոնգրեսին։ Այս երկու միջոցառումները կարևոր հարթակներ են Հայաստանի համար՝ ներկայացնելու ազգային բնապահպանական առաջնահերթությունները և ցուցադրելու առաջնորդությունը տարածաշրջանային և գլոբալ մակարդակներում։

Հանդիպման ընթացքում քննարկվել է նաև Հայաստանի հնարավոր ներգրավվածությունը ENACT գործընկերության մեջ՝ IUCN-ի կողմից առաջնորդվող միջազգային նախաձեռնություն, որը խթանում է բնության վրա հիմնված լուծումները՝ ուղղված կլիմայական փոփոխության, կենսաբազմազանության կորստի և հողերի դեգրադացիայի փոխկապակցված խնդիրների հաղթահարմանը։

Շնորհակալություն ենք հայտնում ՀՀ շրջակա միջավայրի նախարարությանը արդյունավետ երկխոսության և ջերմ ընդունելության համար։ FPWC-ն շարունակում է իր հանձնառությունը՝ համագործակցելու IUCN-ի, նախարարության և այլ գործընկերների հետ՝ նպաստելու ներառական, գիտահենք լուծումների կիրառմանը՝ ապահովելու Հայաստանի և տարածաշրջանի ավելի կայուն ու կենսաբազմազան ապագան։